22.2.17

Nýggjur bloggur

Eg havi fingið mær ein nýggjan  blogg. Hesin hevur ikki riggað, sum hann hevur skulað, og eg havi ikki havt tol við at fingið hann í rættlag, so nú gjørdi eg tað bara av, eg byrjaði av nýggjum. Hesin sleppur tó at standa nakað enn. Nýggi bloggurin eitur Les og lær og sæst her.

14.2.16

Mín bloggur

Hesin bloggurin er ikki so hugaligur, sum eg ætlaði, hann skuldi vera.
Eg havi skrivað, og eg havi lagt myndir út, men ein dag - nú er nakað síðani, sá eg, at myndir vóru burtur og formateringar farnar av lagi. Royndi at rætta upp uppá nakað av tí, men til fánýtis. Eg havi ikki funnið myndirnar aftur - og tær eru ikki so fáar. So havi eg roynt at lagt okkurt nýtt út, men sama skil.
Okkurt innlegg havi eg av tí sama koyrt burtur.
Eg havi umhugsað at latið aftur, hugsið um tað framvegis, men eri enn ikki rættiliga komin hartil.
Men at hava ein blogg, sum skikkar sær sum hesin, er ikki so hugaligt.

Kanska eg finni uppá okkurt....

25.5.13

Lesing - foreldur ella skúli.

Hvør skal læra børnini at lesa? Er tað skúlin ella foreldrini? Fyri mær er tað eingin ivi: Tað er skúlin, sum skal undirvísa og leggja tað so til rættis, at børnini fáa bestu umstøður at læra, men tað eru foreldrini, sum kunnu gera tað so, at tað, sum barnið hevur lært í skúlanum, festir seg. Tað er heima, gleðin um at lesa sprettur. Tað eru foreldrini, sum kunnu geva skumpið, sum kann vera neyðugt. Tað er heima, hjartað er.
Hendan faldaran havi eg gjørt til at tit, sum foreldur eru, kunnu fáa eitt sindur av ráð og leiðbeining.
Skúlaárið er farið at halla, men eingin forðing er fyri at lesa alla summarferiuna, til hon er at enda komin. Heldur hinvegin eigur lesingin at verða hildin við líka hesar 7 vikurnar, summarferian er.
Setið tíð av!

Skriftmálið er lykilin til vitan um tátíð, nútíð...... og framtíðina, hvør veit?



15.4.13

Samanberingar

Bókstavaraðið er her skipað á ein øðrvísi hátt enn vit síggja tað vanliga. Nakrir bókstavir standa her omanfyri regluna og aðrir niðanfyri. Vita, um tú kanst síggja hesa skipan.

 
A   Á   E   F   H   I   Í   K   L   M   N   T   V   Y   Ý   Æ   EI   EY
___________________________________________
 
B   D   Р  G J   O   Ó   P   R   S   U   Ú   Ø   OY  


Sigast skal, at ógvuliga ofta síggja børn, sum ikki enn duga at lesa, hvat hetta gongur út uppá. 

24.10.12

Meir um lesing

Tað er stuttligt at lesa. Tað er stuttligt at skriva.
Við at lesa gerast vit betri til at lesa.
Við at lesa vita vit meir.
Við at lesa duga vit meir.
Við at lesa kenna vit fleiri orð. 
Við at kenna fleiri orð duga vit betri at skriva.
Við at kenna fleiri orð ber betri til at siga frá.
Hvussu verður lisið? 
Hvussu nógv verður lisið? 
Hvussu væl verður lisið?
Hentta blaðið kann vera nyttugt, tá ið lisið verður hart, kanska eina søgu fyri lítlabeiggja ella dóttur - ella onkrum øðrum....

23.9.12

Framløga

Skal hava framløgu á foreldrafundi komandi týskvøld um lesing í 3. flokki. Havi sitið nú og lagt hana til rættis, og sum vera man, má eg geva foreldrunum nøkur ráð. Her er nakað av tí, eg havið hugsað mær at tikið fram.
Tað er so stuttligt og hugaligt at lesa, at skriva, at tekna, at klippa, at granska, tað er so stuttligt at......

16.9.12

Á loftinum

Havi verið í gongd við at fáa skil á tingunum nú nakrar teir síðstu dagarnar. Tá ið mann ger tað, kann mann koma fram á mangt og mikið. Í gjárkvøldið kom eg fram á nakrar akvareltekningar, sum lógu í einum blokki í eini eskju, og sum eg gjørdi fyri yvir 20 árum síðum. Eg hevði næstan gloymt myndirnar, so tað var stuttligt at síggja tær aftur, sum at hitta ein góðan vin aftur. Í einum skápi fann eg eina so fína dós við liti og pensli í, so nú veit eg ikki, um tað er ein ábending um, at eg skal í gongd aftur.
Døtrarnar, Rotha og Gunvør, og systkinabørnini, Rutt og Rakul
Gunvør og Rotha geva seyði í Hattarvík
Døtrarnar og ein drongur í grannalagnum
Eg við Gunvør at brósti

4.8.12

Rættindi og ábyrgd

Nú í seinastuni í kjalarvørrinum av, at hjúnabandslógin í Danmark er broytt, og samkynd hava fingið loyvi til at giftast í kirkjuni, er kjakið um hvørt tey samkyndu kunnu ganga í skrásett parlag ella í hjúnalag saman rættiliga tikið seg upp aftur. Eisini í Føroyum. Felagskapurin LGBT ger alt fyri at fremja kunnleika og venda onnur við, so at samkynd skulu kunna vinna størri rættindi og kunna vera viðurkend sum ein serstakur partur í samfelagnum. Ein partur av hesum rættindum nevna tey javnstøða.
Bjarni Lisberg, sum er talsmaður hjá LGBT í Føroyum, segði undan løgtingsvalinum 2011, at nú var høvi at velja politikarar, sum siga "ja til fjølbroytni, ja til javnrætt og ja til kærleikan", sum hann málbar seg.
Á Ólavsøku gjørdu tey eitt stórt átak, eitt tiltak, sum tey nevndu Faroe Pride, og sum nógv fólk møttu upp til. Tey hava í hvussu er kunnað gjørt vart við seg, bæði her og har. Endamálið? At gera vart við seg, at tey ynskja størri rættindi.
Men so kemur tað: Eg skilji ikki rættiliga, hví tað bert hevur verið tosað um "rættindi" í sambandi við kjakið um, at samkynd skulu kunna ganga í hjúnalag hvørt við annað. Tosað hevur verið um rættindi, mismun, mannarættindi, tolsemi, diskriminering, kærleika..... Undrist á, hví eg ikki havi hoyrt orðið "ábyrgd" nevnt við einum orði. 
Tá ið vit giftust, fingu vit nøkur rættindi, men vit fingu eisini ábyrgd og skyldur mótvegis hvør øðrum, m.a. forsyrgjaraskyldu.
Sum eg skilji hjúnabandið, so er tað kærleiki, men ikki bert kærleiki, rættindi, men ikki bert rættindi, - kærleiki, rættindi og ábyrgd.

1.5.12

Pinterest




Sum eg havi surfað á netinum, eri eg millum annað komin fram á hesa frálíku heimasíðuna um undirvísing, lesing og mangt mangt annað. Myndin omanfyri er frá hesi heimasíðuni og sigur ikki so lítið.

12.3.12

Skriftasløg og okkara ð

Eg havi altíð verið hugtikin av ymiskari skrift, hugt við undran eftir fólki við vakrari hondskrift. Persónligari skrift. Gomlum dagbókum, skrift við blekki, penni ella blýanti. Skriviamboð, sum hava og geva hvør sínar eginleikar. Sjálv átti eg fyri mongum árum síðani ein blekkpenn, sum eg brúkti dúgliga og legði meg eftir at skriva vakurt.
Áhugin fyri skrift er har enn, men nú er tað vorðið í so ringt at kappast við telduna og alla ta ørgrynnu av skriftasløgum, sum har er.
Av tí, at mær famvegis dámar væl at skriva og seta upp, var tað so, at eg ynskti at hava fleiri møguleikar á mínari egnu teldu.
Nú ein dagin kom eg fram á eina heimasíðu við ymiskum skriftasløgum. Fleiri av teimum vóru ókeypis at taka niður, men so bar eisini til at keypa sær til enn fleiri. 10.000 fontar fyri 19.99$. Og hvat gjørdi eg? Keypti pakkan.
Eg eri so glað fyri at hava fingið atgongd til so mong skriftasløg, og havi gjørt dúgliga brúk av teimum.
Men eisini her rakar ð'ið okkum. 
FontForLinux.com
Føroyskt er eitt mál við ð, kanska nógv meir enn vit vanliga geva okkum far um. Bert nú hesa stuttu tíð, eg havi brúkt hesar ymisku skriftirnar, havi eg rent meg fasta upp til fleiri ferðir. Av tí, at tað býður mær ímóti at nýta bókstavin d ístaðin, tann sum líkist ð'inum mest, so setti eg meg at vita, hvar tað kanska best bar til. Skrivaði mítt egna navn við 40 skriftasløgum, og kom har fram til, at bert minna helvtin hevði bókstavin ð. Eg brúkti mítt egna navn, tí millumnavnið hevur bókstavin. Tíbetur ber ofta til at brúka d'ið, uttan at tað sæst, men til aðrar tíðir má skriftin sleppast. Mangan keðiligt, tí skriftin er so vøkur, men so er tað aftur har. Mál okkara er føroyskt.
Har hevði hondskriftin ikki staðið føst.


19.2.12

Nýggj byrjan

Elski at sita og diggast við okkurt smátt, klippa, skriva.....
Í gjár skuldi eg í føðingardag hjá einari ungari gentu, sum fylti 20 ár, men eg helt ikki tað var serliga lætt at finna uppá nakra føðingardagsgávu til hennara.
Hugskotið kom tó: Eftir at eg í mong ár ikki havi hildið meg at havt tíð til tað handaliga, av tí at eg havi gingið í skúla og annað við síðuna av arbeiði í skúlanum, so er alt tað gamla komið afturíaftur. Eg hevði gjørt okkurt klipp áður, so hví ikki? Jú unga daman fekk eina mynd við ljósagrønari rammu.
Nú fekk eg blóð á tonnina, eg mátti fara at klippa í dag, eg so gjørdi. Eg átti eina rammu í skuffuni, so tjumshey og nakrar tímar, so var myndin har.
Ketturnar og stararnir eru mítt vørumerki, tey mugu við.




12.2.12

Lesitilfar

Í seinastuni havi eg sitið og tikist við at gera tilfar til næmingarnar hjá mær, sum eg kann brúka til at læra tey nakrar lesistrategiir, tilgongdir til at læra at lesa og læra nýggj orð. Hetta er ikki minst gott til næmingar, sum hava ilt við at koma í gongd, men eisini er tað gott til teir smæstu flokkarnar og næmingar, sum skulu læra eitt fremmandamál. Slík kort kunnu tó ongantíð standa einsamøll, men mugu alla tíðina lærast. Næmingarnir mugu fáa at vita beinleiðis, eksplisit, hvussu teir skulu gera. 
                                                              
 
    

11.12.11

Bókstavaraðið

Eg sá hetta á einum bloggi - ella rættari á fleiri bloggum - og kundi so ikki lata vera við at vísa hetta á mínum. Haldi hetta er so sigandi. Soleiðis læra børnini bókstavirnar nú á døgum. Vit eiga jú at læra børnini út frá tí kenda.