Heimsins størsta Jólaskip

Í kvøld klokkan 6.00 

stevndi heimsins størsta jólaskip inn á Klaksvík

fult mannað við jólamonnum.

Jólarómurin hoyrdist um allan býin 

og fólk fór av húsi at taka ímóti.

Eisini var hornorkestrið og tók ímóti.

Mary's boychild og nógvir aðrir vóru at hoyra.

 Jólamenn róptu og stýrdu 

og søgdu seg verða noyddar at taka so stórt skip í nýtslu í ár, 

tí so nógv børn høvdu skikkað sær so væl.

 Skipið loysti eina rúgvu av fýrverki av, ein vøkur sjón,

beint uttan fyri stovuvindeygað.

Frensurin lá á stólinum sum um einki var hent. 

Hann lat seg ikki merkja av alskyns jólabrúsi.

At enda fóru jólamenninir við lítlabáti í land á Stongunum, 

har ein stór fjøld stóð og tók ímóti teimum.
Norðlýsið hevði seinni um kvøldið okkurt at siga um hetta tiltak,

Fullsett kirkja

Gleðilig jól

Jólabarnagudstænastan í Christianskirkjuni 16.12.10

Gleðilig jól

Hvørt ár upp undir jól, ofta seinasta skúladag áðrenn jólaferiuna, savnast næmingar frá báðum teimum stóru skúlunum og næmingar frá miðnámsskúlunum til jólagudstænastu í Christianskirkjuni, 

ein frálík løta hvørja ferð.

Eftir gudstænastuna savnast lærarar í kirkjukjallaranum til ein drekkamunn.

Her er eitt brot frá 2008, sum Erik Biskopstøð hevur sett saman

Jólabarnagudstænasta í Christianskirkjuni 

Tá ið næmingarnir at enda syngja Gleðilig Jól saman, tá er tað sum ein ylur rennur niður eftir rygginum, rørandi.

“Gleðilig jól! Gleðilig jól!”
Ljóðar av himli einglalag.
“Armi syndari, óttast ei nú,
Gleðiboðskapin hoyrir tú:
:,: “Jesus er føddur í dag.” :,:

Faðir vár! Faðir vár!
Høgt tó tú á himli býrt,
Ikki gloymdi tú barnið títt,
elskaði syndiga hjarta mítt;
:,: Veri um ævir tær dýrd. :,:

Frelsari mín! Frelsari mín!
Náði tín hon er mítt skjól.
Paradísportrið er opnað mær,
aldri kann eg fulltakka tær
:,: Fyri gleðilig jól. :,:

Pakkakalendarin

Nú er pakkakalendarin, ella rættari teir, 

farnir suður til Havnar til tvær diddur har suðuri. 

Men omman gloymdi at taka myndir av teimum, tíverri. 

Kanska tað verður ein møguleiki hesumegin jól kortini.

Einglajól

Jólakrókurin

Einglajól, kristin jól.

Hvat slag av jólum vilja vit hava? Reyð, hvít, lilla, sum sigst bera boð um advent. Kavajól, grann, músajól, nissujól, vættrajól

Eg haldi, tað er ringt at halda fokus, ringt at minnast til, hví vit halda jól í øllum meldrinum av gávum, innkeyp, reklamum, har øll, allir handlar royna hvør í teirra lagi at fáa sum mest burtur úr.   Ikki at siga teir ringar fyri tað.

Men uttan mun til alt, so er tað stuttligt at taka jólaprýðið niður av loftinum fyri at heingja tað upp ymsastaðni. Tað hugnar um.

Mær dámar nú væl reyð og grøn jól, men ikki so væl nissujól.

Jólaprýði

Nú tendrast túsund jólaljós...... hesi eru ikki tendrað enn, men skjótt fara tey eisini at lýsa..... og móðir tendrar tá øll ljós, tey skína í hvønn krók, og vítt um heimin, sigur hon,  at lýsa stjørnan tók.  

Jólaprýðið er so smátt komið fram.

                                                      

Pakkakalendarin

Nú er ein partur komin í hús, jólagávurnar til pakkakalendararnar. Men tað er meir enn helvtin eftir, og tað eru tvær lítlar diddur, sum skulu hava. Eg haldi tað vera ringt at finna uppá. Tað skal heldur ikki bara vera skrambul, sum kemur at rekast allastaðni.

Eitt afturar er eisini, hvussu skulu teir síggja út? Posi, togendi, toystykki upp á veggin, ílat.....ja, har má eg eisini  leggja høvdið í blot ogfinna upp á okkurt. Ein vika eftir.

1. desember í hondum

Jólapyntið komið fram. Mynd frá í fjør.

Jólaperur, jólanissur, jólakalendarar, jólagávur, jólahjørtu, jólareingerð, jólastás, jólagestir, jólaljós, jólakøkur..... eg má heldur fara ígongd, eg havi ikki tikið alt niður av loftinum enn. Og eg eri ikki farin undir at baka.

Men áðrenn 1. desember, ætli eg, skal  alt vera komið upp at hanga.